ಅಂತರಾಳ

ಮನದಾಳದ ಮಾತನ್ನು ಹೇಳಲೇ?

ಇನಿಯಾ, ನೀನಿಲ್ಲದೆ ಮನೆಯೆಲ್ಲ ಖಾಲಿ

ಮನವೆಲ್ಲ ನಿನ್ನದೇ ಖಯಾಲಿ. ||

ಮುಂಜಾವಿನ ಹೊನ್ನಿನ ಕಿರಣ

ಬೀಳೆ ನೆನಪಾಗುವುದು ನಿನ್ನ ಚುಂಬನ|

ಹಕ್ಕಿಗಳ ಚಿಲಿಪಿಲಿ ಕಲರವ

ಕಿವಿ ಕಾತರಿಸುವುದು ನಿನ್ನ ಪಿಸುಮಾತಿನ ರವ ||

ಹೂವು ಬೀರಿದ ಕಂಪು

ಮರೆಯಗೊಡದು ನಿನ್ನ ನೆನಪು|

ಹೊರಗೆ ತಂಪು ಗಾಳಿ ಬೀಸುತಿರೆ

ನಿನ್ನ ಒಲವ ಧಾರೆ ಕಾಡುತಿರೆ||

ಆಗಸದಿ ಚೆಲ್ಲಿಹುದು ತಾರೆಗಳ ಕಾಂತಿ

ಕಂಡಿದ್ದೆ ನಿನ್ನ ನಯನ ತುಂಬ ಪ್ರೀತಿ|

ಮುಗ್ಧ ಕಂದನ ಮುದ್ದು ಕೇಕೆ

ನೆನಪಿಸುವುದು ನಿನ್ನ ನಗುವ ರೇಖೆ

ನಿನ್ನ ನೆನಪು ಮತ್ತೆ ಮತ್ತೆ ಕಾಡುತಿದೆ ,ಹೀಗೇಕೆ?||

ಭಾವನ

ಈ ಬಾಳ ಯಾನದಲ್ಲಿ ನಾ ಪಯಣಿಸುತಿರುವಾಗ
ಉಬ್ಬರ ವಿಳಿತಗಳ ಜೊತೆ ಸಾಗುತಿರುವಾಗ
ನೀ ಬಂದೆ ಅನಿರೀಕ್ಷಿತವಾಗಿ
ಬಾಳಿಗೆ ಭರವ್ಸೆಯ ಸ್ನೇಹಿತನಾಗಿ

ಕಳೆದೆ ನಾನು ಅಮೂಲ್ಯ ಕ್ಷಣಗಳನ್ನು
ವರ್ಣಿಸಲಾರೆ ಈಗ ಆ ಆನಂದವನ್ನು
ಹತ್ತಿರವಾದೆ ನೀ ಈ ನನ್ನ ಮನಕೆ
ಶಾಶ್ವತವಾಗಿ ನಿನ್ನ ಜೊತೆಯಿರುವ ಬಯಕೆ

ಬಣ್ಣ ಬಣ್ಣದ ಈ ಕನಸಿನ ಲೋಕ
ನೀ ಆದೆ ಹೊಸ ಆಸೆಗಳಿಗೆ ಚಾಲಕ
ಆವರಿಸಿದೆ ನನ್ನ ದಿನದ ಪ್ರತಿ ಕ್ಷಣ
ಸರಸ ವಿರಸದ ಸಮಯಗಳ ಮಿಶ್ರಣ

ಬಂದೆ ಬಂತು ಆ ನಮ್ಮ ಅಗಲುವ ದಿನ
ನಿಯಂತ್ರಿಸಿದೆ ನಾ ನನ್ನ ಮನದ ಭಾವನ
ಕಾಡುತಿವೆ ನಿನ್ನ ನೆನಪುಗಳು ಅನುದಿನ
ಕಾಯುತಿರುವೆ ನಿನಗೆ….ಎಂದು ಪುನರ್ಮಿಲನ?